له‌ ڕۆژی جیهانی خوێن به‌خشیندا
په‌یامنێری هه‌ولێر: ئه‌وان به‌ به‌رگه‌ سوره‌كه‌یان خۆشی ده‌رده‌بڕن و هه‌ڵده‌په‌ڕن، به‌ڵام له‌ ناخه‌وه‌ وه‌ك به‌رگه‌ سوره‌كه‌یان پێویستیان به‌ خوێن هه‌یه‌ هه‌روه‌ك ڕه‌نگه‌ سوره‌كه‌ی به‌ریان تا چۆن باڵایان به‌ره‌نگی سور داپۆشراوه‌ وه‌هایش جه‌سته‌یان پڕبێت له‌ خوێن. نه‌خۆشانی تالاسیمیا سوپاسی یه‌كه‌ به‌ یه‌كه‌ی خوێن به‌خشان ده‌كه‌ن، به‌ گوته‌ی ئه‌وان به‌ خوێنی خوێن به‌خشان به‌رده‌وام ده‌بن له‌ ژیانیان. 14ـی حوزه‌یرانی هه‌موو ساڵێك به‌ ڕۆژی جیهانی خوێن به‌خشین ناسێنراوه‌ له‌و ڕۆژه‌دا له‌ هه‌ولێری پایته‌خت به‌ گوێره‌ی ئاماری سه‌نته‌ری گواستنه‌وه‌ی خوێن 131 كه‌س ئاماده‌بوون خوێن ببه‌خشنه‌ توشبوانی تالاسیما و نه‌خۆشانی شێرپه‌نجه‌و ئه‌و نه‌خۆشانه‌ی تری كه‌ پێویتسیان به‌ خوێنه‌. ئه‌حمه‌د عه‌لی خوێن به‌خشێكی شاری هه‌ولێره‌ ، پیشه‌ ئه‌حمه‌د كرێكارییه‌ و هه‌میشه‌ پێی خۆشه‌ به‌ جه‌سته‌شی خوێن ببه‌خشێت به‌وكه‌سانه‌ی كه‌ پێویستیان به‌خوێنه‌. ئه‌حمه‌د عه‌لی گوتی: چه‌ندین جار ده‌ستم له‌كرێكاری هه‌ڵگرتووه‌ و ڕۆشتوم بۆ خوێن به‌خشین و له‌ به‌رانبه‌ر خوێن به‌خشینه‌كه‌ماندا چاوه‌ڕوانی هاوكاری نین، ته‌نها چاوه‌ڕوانی پاداشتی خوایین. زانایی ئایینی ئیسلامی مه‌لا ئه‌میر گه‌ردی گوتی: به‌خشینی خوێن گه‌وره‌ترین جۆری به‌خشینه‌، چونكه‌ ده‌بێته‌ هۆی به‌خشینه‌وه‌ی ژیان، خوای گه‌وره‌ش ده‌فه‌رموی «هه‌ركه‌سێك نه‌فسێك له‌ مردن رزگار بكات، وه‌ك ئه‌وه‌ وایه‌ هه‌موو مرۆڤایه‌تی زیندوو بكاته‌وه‌. مه‌لا ئه‌میر ڕونیشكردوه‌ كه‌ خوێن به‌خشین جگه‌ له‌وه‌ی جوانترین جۆری یارمه‌تیدانه‌، پێغه‌مبه‌ری خوا فه‌رمانی فه‌رمووه‌ خوای گه‌وره‌ به‌ هه‌موو ده‌سه‌ڵات و توانای خۆی یارمه‌تی ئه‌و كه‌سه‌ ده‌دات كه‌ یارمه‌تی كه‌سانی دیكه‌ ده‌ده‌ن، هیوادارم ئه‌و خێر و جۆره‌ به‌خشینانه‌ و هاوكارییه‌ به‌رده‌وام بێت، به‌ تایبه‌ت كه‌ كه‌سانێك هه‌ن، له‌ نه‌خۆشانی تالاسیما و جۆه‌كانی نه‌خۆشی خوێن به‌ شێوه‌یه‌كی به‌رده‌وام پێویستیان به‌خوێنه‌. له‌ لایه‌ن خۆشییه‌وه‌ سروه‌ عه‌لی به‌رپرسی ڕاگه‌یاندنی كۆمه‌ڵه‌ی تالاسیما له‌ هه‌ولێر به‌ ناوی كۆمه‌ڵه‌كه‌یانه‌وه‌ زۆر سوپاسی هه‌موو خوێن به‌خشانی كرد. سروه‌ گوتی: ته‌نانه‌ت سوپاسی ئه‌و كه‌سانه‌یش ده‌كه‌ین ئه‌گه‌ر ته‌نها بۆ جارێكیش بێت خوێنیان به‌خشیوه‌، هاوكات سوپاسی به‌رێوه‌به‌رایه‌تی سه‌نته‌ری بانكی خوێنی هه‌ولێری كرد كه‌ زۆر یارمه‌تی توشبوانیان ده‌ده‌ن و خوێنیان بۆ په‌یداده‌كه‌ن له‌ هه‌ڵمه‌ته‌كانیاندا.
ژماره‌ی بینین:
973
به‌روار:
29/06/2014
بیروڕاکان
هیچ داتایه‌ک به‌رده‌ست نیه‌ .
کۆمێنتی خۆت بنێره‌      

زیاتر
1 بۆ 16 له‌ کۆی 25