رۆژی جیهانی‌ په‌رســـتاران له‌ نێوان ئه‌رك و مافی په‌رستاران دا
ئاماده‌كاران: ئه‌رشه‌د ته‌حسین - نازه‌نین عوسمان - ئه‌حمه‌د هاشم - ریواس عبدالله په‌رستار ئه‌و توێژه‌ گرنگه‌ی‌ كۆمه‌ڵه‌ كه‌ هه‌میشه‌ به‌ ته‌نگ ئێش و ئازاری‌ نه‌خۆشه‌وه‌یه‌, په‌رستار ئه‌و مرۆڤه‌ ناخ پاك و خه‌م ره‌وێنه‌یه‌ كه‌ هه‌ر به‌ ناوهێنانی‌ ئارامیی به‌ نه‌خۆش ده‌گه‌یه‌نێت. گه‌وره‌یی و مه‌زنی‌ په‌رستار وای‌ كردوه‌ له‌ سه‌رتاسه‌ری جیهان دا رۆژێك به‌ ناوی‌ په‌رستارانه‌وه‌ ناو بنرێت, هه‌ربۆیه‌ له‌ جیهان دا رۆژی 12/5ی‌ هه‌موو ساڵێك به‌ ناوی‌ په‌رستارانه‌وه‌ ناوزه‌ند كراوه‌ و له‌سه‌رتاسه‌ری جیهان دا ئه‌و رۆژه‌ یاد ده‌كرێته‌وه‌, له‌ كوردستانیش له‌و رۆژه‌دا به‌ چه‌ندین چالاكی و مه‌راسیمی جۆراو جۆر به‌رز راده‌گیرێت . ئێمه‌ لێره‌دا ده‌مانه‌وێت به‌ چه‌ند سه‌رنجێكی‌ خێرا راو بۆچوونی‌ په‌رستاران خۆیان سه‌باره‌ت به‌ رۆڵ‌ و ئه‌ركی‌ په‌رستاران بزانین , هه‌ربۆیه‌ له‌ زاری‌ په‌رستارانه‌وه‌ رۆڵی په‌رستارانمان هه‌ڵسه‌نگاند. مافه‌ دابین كراوه‌كان له‌ ئاست ئه‌ركی‌ په‌رستاران دا نین سامان نادر له‌ نه‌خۆشخانه‌ی‌ فریاكه‌وتنی‌ هه‌ناوی‌: ئاماژه‌ی‌ به‌وه‌دا كه‌ مافه‌ دابین كراوه‌كانی‌ په‌رستار له‌ ئاست زۆری و قورسی ئه‌ركی‌ سه‌رشانی‌ په‌رستاران دا نین و به‌ شێوه‌یه‌كی‌ گشتی‌ په‌رستار غه‌دری لێكراوه‌, ئه‌و په‌رستاره‌ی‌ فریاكه‌وتنی‌ هه‌ناوی‌ پێی وایه‌ كه‌ باشتر كردنی‌ ره‌وشی ژیانی‌ په‌رستار به‌نده‌ به‌ باشكردنی‌ ره‌وشی ته‌ندروستی‌ و كه‌رتی‌ ته‌ندروستی‌ به‌ گشتی‌, هه‌روه‌ها حه‌قه‌ داكۆكی بكرێت له‌سه‌ر باشتر كردنی‌ موچه‌ و ده‌رماڵه‌ی‌ مه‌ترسی و پیشه‌یی و دابین كردنی‌ شوێنی‌ نیشته‌جێبوون بۆ په‌رستاران و كارمه‌ندانی‌ ناوه‌ندی‌ ته‌ندروستی‌ به‌ گشتی‌. هه‌روه‌ها شوان عبدالرحمن له‌ نه‌خۆشخانه‌ی‌ شه‌هید غه‌ریب هه‌ڵه‌دنی‌ له‌ دووكان: هاوڕای‌ هاوپیشه‌كه‌یه‌تی‌ و پێی وایه‌ كه‌ ته‌نها له‌ رۆژی جیهانی‌ په‌رستاران دا ئه‌م توێژه‌ به‌ بیردێنه‌وه‌ و به‌سه‌ر ده‌كرێنه‌وه‌ ده‌نا هیچ كه‌س هه‌ست به‌ ئه‌رك و ماندوو بوونی‌ په‌رستاران ناكات له‌ رووی رێزگرتن له‌ پیشه‌كه‌ی‌ و دابین كردنی‌ موچه‌یه‌كی‌ شیاو و شوێنی‌ نیشته‌جێبوون و پێدانی‌ ده‌رماڵه‌ی‌ پیشه‌یی و مه‌ترسی, كه‌ ئه‌مانه‌ بنه‌مای‌ خۆشگوزه‌رانی‌ و به‌رزكردنه‌وه‌ی‌ ئاستی‌ ژیانی‌ په‌رستارانن. شانازی‌ ده‌كه‌م به‌ پیشه‌كه‌مه‌وه‌ ئاكام موئه‌یه‌د له‌ نه‌خۆشخانه‌ی‌ شه‌هید سه‌لاحی‌ ده‌روونی‌: ئاماژه‌ی‌ به‌وه‌دا سه‌رباری‌ هه‌موو ئه‌و كه‌م و كوڕی و گرفتانه‌ی‌ كه‌ له‌ ناوه‌ندی‌ ته‌ندروستیدا هه‌ن به‌ تایبه‌ت به‌رامبه‌ر په‌رستاران به‌ڵام من شانازی‌ به‌ پیشه‌كه‌مه‌وه‌ ده‌كه‌م و بێ هیلاك بوون و ماندوو نه‌ناسانه‌ خزمه‌ت ده‌كه‌م. ئه‌و په‌رستاره‌ ئه‌وه‌شی خسته‌ روو كه‌ هه‌موو كه‌س ئه‌وه‌ی‌ لا روونه‌ كه‌ به‌ ته‌نها دكتۆر ناتوانێت خزمه‌ت به‌ نه‌خۆش بكات ئه‌گه‌ر ستافێك په‌رستاری‌ به‌توانای‌ له‌گه‌ڵ‌ دا نه‌بێت, بۆیه‌ ناكرێت ئه‌و رۆڵه‌ گرنگه‌ی‌ سه‌رشانی‌ په‌رستار له‌ به‌رچاو نه‌گیردرێت. موچه‌ هه‌موو شتێ نیه‌, ده‌بێت په‌رستار گرنگی‌ خۆی بزانێت. تارا ئاراس په‌رستاری‌ زانكۆ له‌ نه‌خۆشخانه‌ی‌ شه‌هید هێمنی‌ هه‌ناوی‌: ئه‌وه‌ی‌ خسته‌ روو كه‌ هه‌موو شتێك نابه‌سترێته‌وه‌ به‌ پاره‌ و موچه‌وه‌, گه‌رچی ئه‌و پێشی وابوو كه‌ پاره‌ و موچه‌ گرنگن بۆ دابین كردن و به‌ره‌و پێشچوونی‌ ژیانی‌ تایبه‌تی‌ په‌رستار, به‌ڵام ده‌كرێت له‌ هه‌نگاوی‌ یه‌كه‌م دا تایبه‌ت مه‌ندی‌ پسپۆڕی له‌ رووی كاركردنه‌وه‌ بدرێت به‌ په‌رستار و هه‌ر په‌رستارێك لای‌ خۆیه‌وه‌ ئه‌رك و مافی خۆی بزانێت و به‌ گوێره‌ی‌ ئه‌رك مافی پێ بدرێت, ئه‌و په‌رستاره‌ی‌ زانكۆ پێشی وابوو كه‌ له‌ هه‌نگاوی‌ دواتردا پێویست ده‌كات په‌رستار پۆسته‌ بكرێت له‌ رووی جل و به‌رگ و سه‌رجه‌م پێداویستیه‌كانی‌ تری كه‌ له‌ ناوه‌ندی‌ ته‌ندروستیدا به‌كاری‌ ده‌هێنێت, هه‌روه‌ها ئه‌و په‌رستاره‌ به‌ گرنگیشی زانی‌ له‌ رووی‌ زانیاری‌ و مه‌عریفیه‌وه‌ په‌ره‌ به‌ تواناكانی‌ په‌رستار بدرێت به‌ تایبه‌ت له‌ رووی كردنه‌وه‌ی‌ خولی‌ جۆراوجۆره‌وه‌ له‌ ناوخۆ و ده‌ره‌وه‌ی‌ وڵات, هاوكات قانع خورشید له‌ نه‌خۆشخانه‌ی‌ گشتی‌ شۆڕش به‌ گرنگی‌ زانی‌ په‌رستار لای‌ خۆیه‌وه‌ خۆی بناسێت و پله‌به‌ندی‌ هه‌بێت بۆ په‌رستار له‌ روانگه‌ی‌ كه‌فائه‌ت وشاره‌زاییه‌وه‌, چونكه‌ ده‌كرێت له‌م رێیه‌وه‌ كه‌رتی‌ ته‌ندروستی‌ به‌ گشتی‌ به‌ره‌و پێش بچێت, پاشان له‌ رووی‌ موچه‌و ده‌رماڵه‌وئیمتیازاتی‌ تره‌وه‌ ژیانی‌ تایبه‌تی‌ په‌رستار باشتر بكرێت و خۆشگوزه‌رانی‌ بۆ فه‌راهه‌م بكرێت . كارمه‌ندێكی‌ ته‌ندروستی‌« ئه‌وه‌نده‌ی‌ ئێمه‌ ماندوو ئه‌بین دكتوره‌كان ماندوو نابن به‌ڵام ده‌ ستخۆشی‌ له‌ئه‌وان ئه‌كه‌ن، ئه‌مه‌ش ده‌ره‌جه‌ دووی‌ په‌رستیارو كارمه‌ند ده‌رده‌خات» كارو پیشه‌ی‌ په‌رستیاری وه‌ك هه‌ر پیشه‌یه‌كی‌ تر گرنگی‌ و بایه‌ خی‌ خۆی هه‌یه‌ له‌ كۆمه‌ڵگه‌دا به‌گشتی‌ و وه‌ له‌ كۆمه‌ڵگه‌ی‌ ته‌ندروستی‌ دا، به‌ جۆرێك ناكرێت له‌ كاری پزیشكی‌ به‌هیج جۆرێك رۆڵ و ئه‌ركی‌ په‌رستیار فه‌رامۆش بكرێت و به‌شێكی‌ گرنگ داده‌نرێت له‌ پرۆسه‌ی‌ چاره‌سه‌ری‌ نه‌خۆشدا له‌یادی‌ جیهانی‌ په‌رستیاران په‌رستیاران جۆن ده‌رواننه‌ پیشه‌كه‌یان، ئایا تا چه‌ند به‌ پیشه‌كه‌یان خۆشحاڵن و ئه‌و كێشه‌و گرفتانه‌ چین كه‌ رووبه‌روی‌ په‌رستیاران ده‌بنه‌وه‌: دڵسۆز كه‌ریم په‌رستیاری كارامه‌: كه‌ بۆماوه‌ی‌ بیست ساڵه‌ كاری‌ په‌رستیاری ده‌كات و كارمه‌ندی‌ به‌شی نه‌شته‌رگه‌ری یه‌ له‌ نه‌خۆشخانه‌ی‌ شه‌هید پێشره‌و ووتی‌«له‌رۆژی‌ جیهانی‌ په‌رستیاراندا سه‌ره‌ڕایی پیرۆز بایم هیوای‌ ساغ و سه‌لامه‌تی‌ بۆ گشت په‌رستیان و كارمه‌ندانی‌ ته‌ندروستی‌ ده‌خوازم،كاری په‌رستیاری كارێكی‌ پیرۆزه‌و من وه‌ك خۆم زۆر خۆشحاڵم به‌ پیشه‌كه‌م، ماندوو بوون و زه‌حمه‌ته‌كانی‌ رۆژانه‌ كاتێك ده‌بینین بۆ خزمه‌تی‌ خه‌ڵكه‌ زیاتر دڵخۆشمان ده‌كات و سورترمان ده‌كات له‌سه‌ر كاره‌كه‌مان» وه‌هه‌روه‌ها وتیشی‌« هیچ خزمه‌تێك به‌ په‌رستیاران نه‌كراوه‌، هیواداریشم ئاوڕێكی‌ جدی‌ له‌ ژیان و گوزه‌رانی‌ په‌رستیاران بدرێته‌وه‌« گوران حه‌مه‌ شه‌ریف كارمه‌ندی‌ به‌شی فریاكه‌وتن له‌ نه‌خۆشخانه‌ی‌ شه‌هید پێشره‌و له‌م باره‌وه‌ وتی‌: له‌ رۆژی‌ جیهانی‌ په‌رستیان دا هیوای‌ له‌ش ساغی‌ و ته‌مه‌ن درێژی‌ ژیانێكی‌ ئاسووده‌ بۆ سه‌رجه‌م په‌رستیاران و كارمه‌ندانی‌ ته‌ندروستی‌ ده‌خوازام، وه‌ پیرۆزبایی ئه‌م رۆژه‌یان لێده‌كه‌م و ماندوو نه‌بونیان لێ ده‌كه‌م» سه‌باره‌ت به‌ پیشه‌ی‌ په‌رستیاری گۆران وتی‌ «ئیشی په‌رستیاری پیشه‌یه‌كی‌ پیرۆزه‌، پیشه‌یه‌كی‌ مرۆڤانه‌یه‌ و په‌یوه‌سته‌ به‌ ژیانی‌ مرۆڤه‌وه‌ من دڵخۆشم به‌ پیشه‌كه‌م،» وه‌هه‌روه‌ها وتیشی‌« توێژی‌ په‌رستیار توێژێكی‌ ماندووه‌و پشت گوێ خراوه‌، هیوادارم گرنگی‌ زیاتر به‌ په‌رستیاران بدرێت، كه‌موكوریه‌كانیان چاره‌سه‌ر بكرێت و به‌زووترین كات سه‌رجه‌م مافه‌كانیان بۆدابین بكرێت» زۆزگ هیدایه‌ت ره‌شید كارمه‌ندی‌ بنكه‌ی‌ ته‌ندروستی‌ چۆخماخ له‌ شارباژێر سه‌باره‌ت به‌ پیشه‌ی‌ په‌رستیاری وتی‌ « پیشه‌ی‌ په‌رستیاری پیشه‌یه‌كی‌ پیرۆزه‌، ئه‌و په‌رستارانه‌ی‌ كه‌ كه‌ به‌ حه‌زی‌ خۆیان پیشه‌كه‌یان هه‌ڵبژاردوه‌، جیاوازن له‌و كه‌سانه‌ی‌ كه‌ به‌ حه‌زی‌ خۆیان نی یه‌. په‌رستاری‌ ڕاستگۆو ڕاسته‌قینه‌ كاتێك زور خۆشحاڵ ده‌بێ‌ كه‌ چاره‌سه‌ری‌ باشی‌ بۆ نه‌خۆشه‌كه‌ ئه‌نجام بدات ، وه‌ كاتێ‌ به‌ویژدانه‌وه‌ كار بكات و بیه‌وێ‌ حه‌قی‌ نه‌خۆش بدات وه‌ هه‌روه‌ها ئه‌گه‌ر له‌ﻻیه‌ن به‌رامبه‌ره‌وه‌ سوپاس بكرێت، له‌ هه‌مان كاتدا په‌رستار چاوه‌رێی‌ سوپاس نه‌كات، به‌ڵام ئه‌و سوپاس كردنه‌ هانی‌ زیاتر ده‌دات» زۆزگ ده‌رباره‌ی‌ كیشه‌ی‌ په‌رستیاران وتی‌«كیشه‌ كان چه‌ندجۆریكن. له‌وانه‌: كێشه‌ی‌ په‌رستار له‌ شوێنی‌ كاره‌كه‌ی‌ له‌رووی‌ ئیدارییه‌وه‌وه‌، وه‌ به‌شداری پێ نه‌كردنی‌ په‌رستاران له‌ خول و راهێنانه‌كان، وه‌ هه‌روه‌ها جیاوازی كردنی زۆر له‌نێوان دكتۆرو په‌رستار هه‌یه‌.» په‌روین محمود عه‌زیز كارمه‌ندی‌ به‌شی كۆگای‌ ده‌رمان له‌ چه‌مچه‌ماڵ وتی‌: ئیشی‌ په‌رستیارو كارمه‌ندی‌ ته‌ندروستی‌ كارێكی‌ مرۆڤانه‌یه‌و جیاوازتره‌ له‌ كاری به‌ شی‌ تاقیگه‌ و به‌شه‌كانی‌ تر بگره‌ ئه‌توانین له‌ هه‌موو به‌شه‌كاتی‌ تر كاربكه‌ین ، وه‌هه‌روه‌ها كاری ئێمه‌ راسته‌وخۆ چاودێری كردنی‌ باری‌ ته‌ندروستی‌ نه‌خۆشه‌، به‌ڵام جیاوازی‌ ده‌كرێت له‌ نێوانمان له‌ رووی‌ ده‌رماڵه‌وه‌« هه‌روه‌ها په‌روین وتیشی‌ «ئێمه‌ ی‌ كارمه‌ند زۆر ماندوو ئه‌ بین، وه‌هه‌روه‌ها ئه‌وه‌نده‌ی‌ ئێمه‌ ماندوو ئه‌بین دكتوره‌كان ماندوو نابن به‌ڵام ده‌ ستخۆشی‌ له‌ئه‌وان ئه‌كه‌ن، ئه‌مه‌ش ده‌ره‌جه‌ دووی‌ په‌رستیارو كارمه‌ند ده‌رده‌خات» ئه‌یوب حه‌مه‌ غه‌ریب به‌رپرسی نوسینگه‌ی‌ كارمه‌ندانی‌ ته‌ندروستی‌ چه‌مچه‌ماڵ سه‌باره‌ت به‌كاری په‌رستیاران و یادی‌ جیهانی‌ په‌رستیاران وتی‌« به‌بۆنه‌ی‌ یادی‌ جیهانی‌ په‌رستیارانه‌وه‌ پیرۆزبایی خۆم له‌سه‌رجه‌م په‌رستیاران و كارمه‌ندانی‌ ته‌ندروستی‌ ده‌كه‌م، ئێمه‌ وه‌ك نوسینگه‌ی‌ چه‌مچه‌ماڵ له‌ دوای‌ ده‌ست به‌كاربوونمان ساڵانه‌ بۆ ئه‌م یاده‌ ئاهه‌نگێك ساز ده‌كه‌ین، كه‌ تێیدا كۆمه‌ڵێك كارمه‌ندی‌ دڵسۆزی كارمه‌ندانه‌ی‌ كه‌ ده‌ركه‌وتوون له‌ناو كاری ته‌ندروستی‌ دا رێزلێنانیان پێده‌به‌خشین» لە ڕۆژی (12/5) هەموو ساڵیك بە ڕۆژی جیهانی پەرستاران دادەنرێت ، یادی‌ ئه‌و ڕۆژەیه‌ كه‌ فلۆرانس ناینگل تێیدا له‌ دایكبوو بووبه‌ سه‌قامگیری و رچه‌شكێنی كاری په‌رستاری و بنه‌ماكانی‌ ئه‌م پیشه‌یی به‌ زانست كرد هه‌ر بۆیه‌ ئاگاداربوون له‌ ره‌وشی‌ په‌رستار و پیشه‌ی په‌رستاری بەم بۆنەیە سەردانی نەخۆشخانەی ئافرەتان و لەدایك بوونی فێركاریمان له‌ شاری هه‌ولێر كرد و ووتەی چەند پەرستارێكی ئەم نەخۆشخانەیەمان وەرگرت بەمەبەستی خستنه‌رووی داواكارییه‌كانیان بۆ لایه‌نه‌ په‌یوه‌ندیداره‌كان. سەبارەت بەره‌وشی‌ په‌رستاری چەند پرسیارێكمان ئاراستەی ( بێگەرد موستەفا) پەرستاری پەیمانگا كرد: ئێشك: ئایا تا چه‌ند مافەكانتان بۆ ده‌سته‌به‌ركراوه‌؟ تاچەند پزیشكان ڕێز له‌ ماندووبوون و پیشه‌كه‌تان دەگرن؟ بێگەرد موستەفا: دەتوانم بڵێم تا ڕادەیەكی باش مافەكانتان دابین كردوه‌، هەروەها ئەگەر پێویستیمان بە هاوكاری بوو بێت ئەوە هاوكاریشیان كردووین. ئێشك: ئایا لەلایەن نەخۆش و كەسوكاری نەخۆشەكانیش بەهەمان شێوە ڕێزتان لێدەگیرێت؟ كاردانەوەی ئێوە چی دەبێت ئەگەر ئەوان كێشەیان ناوە؟ بێگەرد موستەفا: سەبارەت بەنەخۆش ئەگەر قسەیێكیش بكات یان شتێكیش بڵێت ئەوە ئێمە بەدڵێكی فراوان قسەكانی وەردەگرین چونكە ئەو نەخۆشە و ئازاری هەیە ، بەڵام زۆر جار كەس و كاری نەخۆشەكە كێشە دەنێنەوە ئەوە بێزارمان دەكات. ئێشك: ئایا خولی هۆشیاركردنەوە و بەهێزكردنتان بۆ كراوەتەوە؟ تۆ وەك پەرستارێك بەشداری هیچ خولێكت كردووە؟ وه‌ڵام: من وەك خۆم تا ئێستا بەشداری خولێكی زمانی ئینگلیزیم كردووە كە لەلایەن سەندیكای كارمەندانی تەندروستی كرایەوە ، جێگه‌ی‌ ده‌سخۆشییه‌ و سوپاستان ده‌كه‌ین؟ بۆ رۆژی‌ جیهانی په‌رستارانیش وتی: داواكاریم ئەوەیە زیاتر پەرە بە بواری تەندروستی بدرێت و هەروەها لەم ڕۆژەدا پیرۆزبایی خۆم ئاراستەی هەموو هاوكارەكانم و هاوپیشەكانم لەسەرتاسەری جیهان بە گشتی و لەكوردستان بەتایبەتی دەكەم . هەر سەبارەت رۆژی‌ جیهانی په‌رستاران (عبدلله سامی جەبار) كارمەندی تەندروستی لە نەخۆشخانەی ئافرەتان و لەدایك بوونی فێركاری وتی‌: ئەوەی پەیوەندی بەمافەكانمان هەیە تاڕادەیەك دابین كراوە لەڕووی كارگێری و بەڕێوەبردنەوە ، بەڵام ئەگەر تووشی هەركێشەیێك بین لەگەڵ پزیشكەكان ئەوە پشتگیری لە پزیشكەكە دەكرێت ئەگەر هەڵەكە لەلایەن ئەویشەوە بێت ، تەنیا لەبەرئەوەی ئەو پزیشكە و ئێمە كارمەندە، كەبەڕاستیش ئەمە كارێكی نەشیاوە و نابێت بەم شێوەیە بێت ، بەكورتیەكەی مافی پزیشكەكان لەسەرووی مافەكانی ئێمەوەیە . عبدالله سامی سه‌باره‌ت خولی بەهێزكردن وتی‌: من وەك خۆم كە كارمەندم لەبەشی دەرمانسازی هیچ خولێكم نەبینیوە پێویسته‌ لایه‌نه‌ په‌یوه‌ندیداره‌كان گرنگی به‌م لایه‌نه‌ بده‌ن. عبدالله سامی سه‌باره‌ت به‌ پەیام خۆی بۆ ساڵرۆژی‌ په‌رستاران وتی‌: لێرەوە وێڕای پیرۆزبایی كردن لە پەرستاران هیوای سەركەوتنیشیان بۆ دەخوازم لەكارەكانیان و هەموو بوارەكانی تری ژیانیان ، هیوادارم ئەم بۆنەیە ببێتە مایەی بەدیهاتنی داخوازییەكانیان و جێبەجێكردنی مافەكانیان، داواش له‌ فه‌رمانگه‌ و وه‌زاره‌تی‌ ته‌ندروستی‌ ده‌كه‌م. لەكۆتاییدا چەند پرسیارێكمان ئاراستەی (لەیلا عومەر) پەرستاری ئێشكگر كرد ئەویش ئامادەبوو وەڵامی پرسیارەكانمان بداتەوە ئێشك: ئایا پزیشكەكان ڕێزی پەرستاران دەگرن ؟ دەڵێن لەكاتی ڕوودانی كێشە لەنێوان پەرستار و پزیشكێك ئەوە پشتگیری لە پزیشكەكان دەكرێت، تاچەند ئەم قسانە ڕاستە ؟ لەیلا عومەر: سەبارەت بەڕێزگرتن ئەوە پزیشكەكانمان زۆر باشن ئێمە لێیان ڕازین ، لەكاتی ڕوودانی كێشەش لەگەڵ ڕێزم بۆ هەموو پزیشكەكان ئەوە زۆرجار پزیشكەكان هەڵە دەكەن و هەڵەكەیان دەخەنە ئەستۆی پەرستارەكان كە ئەمەش كارێكی زۆر خراپە . ئێشك: ئایا مامەڵەتان چۆنە لەگەڵ كەس وكاری نەخۆشەكان؟ لەیلا عومەر: ئێمە دەبێت كەس و كاری نەخۆشەكان بكەینە دووبەش ، بەشێكیان مامەڵەیان باشە و بەشێكی مامەڵەكردنیان ناخۆشە بەڵام ئێمە لەهەردوو باردا بەدڵێكی فراوانەوە مامەڵەیان لەگەڵ دەكەین چونكە دەزانین ئەوان دڵیان بەنەخۆشەكانیانەوەیە و خەمی نەخۆشەكانیانە . ئێشك : ئێمە هیچمان نەماوە ئەگەر بەڕێزت شتێكت هەبێت و ئێمە لەبیرمان كردبێت؟ لەیلا عومەر: به‌ بۆنه‌ی‌ ساڵرۆژی‌ په‌رستارانه‌وه‌ پیرۆزبایی خۆم ئاراستەی هەموو هاوپیشەكانم دەكەم لە هەموو جیهان بەگشتی و لەكوردستان بەتایبەتی ، هیوادارم هەر سەركەوتووبن ، سوپاسی ئێوەش دەكەم كە لەخەمی پەرستاران دانە و بیریان لێدەكەنەوە . سه‌ربه‌ست موحه‌مه‌د په‌رستار له‌ سه‌نته‌ری قورگ و گوێ و لوت وتی: ساڵیادی په‌رستاران تا ئیستا لای ئێمه‌ نه‌كراوه‌ته‌وه‌ ئه‌و یادانه‌شی ده‌كرێته‌وه‌ هه‌موو ره‌مزیه‌ چونكه‌ ئێمه‌ له‌ شوێنی تره‌وه‌ مافمان خوراوه‌ ئێمه‌ وه‌كو ده‌رچووی كۆلێژی په‌رستاری هه‌تا ئێستا هیچ جیاوازیه‌كمان نیه‌ له‌گه‌ڵ په‌رستاری په‌یمانگاكان تا ئیستا به‌ پێی قه‌باره‌ی خۆمان پۆست و شوێنمان بۆ دانه‌نراوه‌ تا ئێستا سه‌ره‌تایترین شت موچه‌یه‌ دوای ساڵی له‌ خزمه‌ت (3) هه‌زار دینار جیاوازی هه‌یه‌ له‌گه‌ل ده‌رچوویه‌كی په‌رستاری په‌یمانگاكان كه‌ ئێمه‌ مه‌رجی چوار ساڵ ده‌خوێنین وه‌ ساڵی ئیقامه‌مان بینیوه‌ نه‌موچه ئه‌وه‌یه‌ و هه‌روه‌ها ‌له‌ شوێنی ئیشه‌كه‌شمان به‌ پێی پێویست ئیشمان پی نادرێت چونكه‌ له‌ هه‌موو وڵاتان په‌رستار ئیشی سه‌ره‌كی نه‌خۆشخانه‌ به‌رێوه‌ ده‌بات به‌ ئه‌مری په‌رستار نه‌شته‌رگه‌ریه‌ك به‌رێوه‌ده‌چێت و نه‌خۆشه‌كه‌ له‌لایه‌ن په‌رستاره‌وه‌ ئاماده‌ده‌كرێت بۆ نه‌شته‌رگه‌ری هه‌تا ئێستا په‌رستار وه‌كو پله‌ دوو له‌ ته‌ندروستیدا حسابی بۆ ده‌كرێت ئیتر یادكردنه‌وه‌ له‌و رۆژه‌دا شتێك له‌بابه‌ته‌كه‌ ناگۆرێت به‌س له‌و یاده‌دا واته‌ له‌ یادی رۆژ جیهانی په‌رستاراندا چوار ساڵه‌ به‌ڵێنمان پێده‌درێت ده‌رماڵه‌مان بۆ چاكبكریت ئیتر دوای ئه‌وه‌ هیچ، داواكاریم وه‌كو په‌رستاریكی زانكۆ ئێمه‌ له‌ زانكۆ وانه‌یه‌كمان ئیداره‌ بووه‌ ئیداره‌ی نه‌خۆشخانه‌ به‌ ئێمه‌ به‌رێوه‌ ده‌چێت نه‌ك به‌رێوه‌به‌ی ئیداری هه‌یه‌ هه‌ر په‌یوه‌ندی به‌ ته‌ندروستییه‌وه‌ نیه‌ وه‌ په‌یوه‌ندی به‌ ئیداره‌شه‌وه‌ نیه‌ چونكه‌ ئه‌گه‌ر ئیداریش بیت هه‌ر كێشه‌ نیه‌ به‌ڵام كه‌سیكه‌ له‌ رێگه‌ی حزبه‌وه‌ یاخود له‌ رێگه‌ی شه‌خسێكه‌وه‌ دانراوه‌ و هیچ له‌ ته‌ندروستی نازانیت به‌ڵام ئێمه‌ له‌ كۆلێژ خویندوومانه‌ به‌شێك هه‌تا ئێستاش لێپرسراوه‌كان ده‌رچووی سیی ناوه‌ندین یاخود پۆلی شه‌شی ته‌واو كردووه‌ به‌ ده‌وره‌یه‌ك هاتووه‌ته‌وه‌ ته‌ندروستیه‌وه‌ ئێستاش به‌رێوه‌به‌ره‌. كارمه‌ندی ته‌ندروستی پشتگوێ خراوه‌ ئومێد حه‌مه‌ئه‌مین كه‌ (11) ساڵه‌ خزمه‌تی هه‌یه‌ وتی: ئاور‌ له‌ په‌رستار نه‌دراوه‌ته‌وه‌ به‌ گشتی وه‌ له‌هه‌موو روویه‌كه‌وه‌ پشت گوێ خراون هه‌ر له‌ رووی خزمه‌تگوزاریی و ده‌رماله‌ی مه‌ترسی سه‌یر ده‌كه‌ی ئێمه‌ پله‌ دووین له‌گه‌ڵ دكتۆره‌كان ئه‌وان ده‌رماله‌ی مه‌ترسیان له‌ 100% به‌ڵام ئێمه‌ 50% وه‌ ئه‌وان پله‌ به‌ندیان هه‌یه‌ (مقیم) ئینجا ده‌بیت به‌ (مقیم ده‌وری) وه‌ پاشان ئه‌بن به‌ (مقیم ئه‌قده‌م) ئێمه‌ هه‌ر له‌ شوینی خۆمانین هه‌تا مماوین یه‌ك شتین بۆ به‌خشینی زه‌ویش هه‌مان شته‌ داواكاریم له‌ رۆژی جیهانی په‌رستاراندا هیوادارم وای لێبكریت كه‌ هاتیته‌ ناو نه‌خۆشخانه‌كانه‌وه‌ سه‌ربه‌رز بێت و هه‌ست به‌ خۆمان بكه‌ین ریزمان لێ بگریت هه‌روه‌ك چۆن دكتۆرێك كاتی له‌گه‌ڵ نه‌خۆشیكا ده‌مه‌قاڵه‌یه‌كی ده‌بێت پشتگیری لێ ده‌كرێت ئێمه‌ش هه‌روا بین و كه‌س نه‌توانی ته‌حه‌دامان لێ بكات.
ژماره‌ی بینین:
1753
به‌روار:
12/05/2014
بیروڕاکان
هیچ داتایه‌ک به‌رده‌ست نیه‌ .
کۆمێنتی خۆت بنێره‌      

زیاتر
1 بۆ 16 له‌ کۆی 25